COMUNICADO DE GALEGAS 8M DE OURENSE ANTE A ACCIÓN REIVINDICATIVA DA NOITE DO 8 DE MARZO DE 2019

Dende Galegas 8M consideramos necesario redactar e publicar este comunicado con fin de aclarar o sucedido o 8 de Marzo en Ourense na acción desenvolvida no concerto da Praza do Correxidor logo de ler as declaracións dunha das músicas contratadas para ese concerto publicadas no xornal local “La Región” de Ourense e en “Sermos Galiza”.

Ante a iniciativa da Concellería de Igualdade de Ourense de organizar unha serie de concertos subvencionados pola Concellería de Cultura ás 22:30 horas do 8 de Marzo, a asemblea de traballo de Galegas 8M de Ourense decidiu, por unanimidade, desenvolver unha acción despois da manifestación convocada para expresar a nosa desconformidade con este tipo de actos nun día de reivindicación como é o día das mulleres.

Como colectivo, como ourensás e como mulleres consideramos imprescindíbel visibilizar as problemáticas da cidade  en materia de igualdade e ese era o obxectivo da nosa acción, planificada e acordada pola organización de Galegas 8M Ourense, e ante a confusión que xeraron os artigos publicados, consideramos acaido explicar como se desenvolveron os feitos a noite do 8 de Marzo e deixar clara a finalidade e intención da nosa actuación.

Ás 22.30h entramos na praza do Correxidor con parte da batukada feminista e unha faixa na que se podía ler “O Partido Popular paga concertos e pecha a casa de acollida, desmantela a igualdade, quere derrogar a lei do aborto” para pendurala da varanda da praza. Permanecimos na praza até as 23.25 horas coreando consignas de protesta contra a política de igualdade do Concello de Ourense, por todas e cada unha das prácticas que durante o ano teñen lesionado a política de protección e defensa das mulleres da nosa cidade. Como xa ten expresado o movemento feminista en Ourense noutras ocasións, o 8 de marzo non pode servirlle a gobernos, contrarios aos intereses das mulleres, para facer un lavado de cara.

En Ourense, tal como explicamos a través dun megáfono na propia praza de forma que todas as presentes comprendesen as nosas motivacións, estase padecendo a nefasta xestión por parte da Concellería e de todo o conxunto do goberno en temas de Igualdade, asistencia e cobertura social. Estas son as denuncias que a noite do 8 de marzo se comunicaron:

• Abandonan ás mulleres vítimas de violencia machista xa que non queren xestionar a casa de acollida, recurso que ao parecer carece de interese para o goberno de Ourense.
• Sobrecargan de competencias o xa pouco dotado (carece de educadora e traballadora social) Centro de Información Municipal á Muller, sen aumentar a súa plantilla e diluíndo o sentido mesmo de atención ás mulleres. A isto colaborou o decreto da Xunta que inclúe responsabilidades respecto ao colectivo LGTB ou a xuventude sen incrementar a dotación orzamentaria.
• Suprimen o programa Coeduca, (educación familiar en igualdade e conciliación familiar dirixido a menores de idade) en vigor dende o ano 2012.
• Suprimen o programa Nexus de prevención de violencia de xénero e recupérano de xeito precario sobrecargando o traballo de quen o desenvolve.
• Suprimen o programa Agarimos de prevención dirixido principalmente a institutos.
• Suprimen as Aulas de igualdade dirixidas á xente adulta.
• Eliminan a edición,  publicación e distribución gratuita dos “Cadernos de Igualdade”.
• Retíranse da colaboración e financiación do festival de Voces Femeninas.
• Conceden o Premio Clara Campoamor por primeira vez a un home.
• Subvencionan un periódico que publica frecuentemente artigos claramente misóxenos desoíndo as continuas protestas que se fan no Consello Municipal de Igualdade ao respecto dende o ano 2016.
• Manipulan os programas do Concello tanto en torno ao 25N como ao 8M. Seguimos escandalizadas porque substituíran a programación do 8M por zumba e aquagym no ano 2018.
• Non ofertan obradoiros específicos para mulleres embarazadas dende a Concellería de Igualdade.
• No ano 2018 fan pública a súa posición respecto á folga do 8M de xeito tan
  desastroso e vergoñento que logran que sexa emitida a nivel estatal como exemplo de ignorancia e incapacidade política.
• Publican unha proposta de RPT para o Concello con linguaxe sexista e onde a Concellería de Igualdade perde a súa autonomía pasando a depender de Saúde.

Ante este claro desmantelamento das políticas sociais en materia de igualdade, o desinterese e a ineptitude dun goberno que abandona as mulleres no seu conxunto pero en especial as que se atopan en situación de vulnerabilidade, como colectivo feminista implicado na loita pola mellora da vida das mulleres, denunciamos o gasto de orzamento público nun acto que como citamos anteriormente, tiña a finalidade de facer un “lavado de cara” desta institución cara a cidadanía ourensá.

Por iso, estamos enormemente sorprendidas ante as acusacións que se verten contra nós por parte dunha integrante dos colectivos contratados para este concerto pois en todo momento deixamos claro que a nosa crítica é contra as políticas do Concello e e en ningún caso contra as artistas e os grupos, moitos deles propostos por nós nalgunhas ocasións para que foran contratadas para actos.

Vémonos na obriga de dar resposta as graves acusacións de agresións e o sinalamento de compañeiras e a publicación dos seus nomes nos medios, coa única intención de mancar. Eramos un centenar mulleres as que a noite do 8 de marzo desenvolvimos a acción e estamos orgullosas de ter denunciado as inxustizas que vivimos en Ourense.

A nosa acción e a xente que nela participou, abandonou a Praza ás 23.25 horas, momento no que se podía ter retomado o concerto. Sabemos que a previsión de duración sobrepasaba amplamente ese horario, descoñecemos os motivos que levaron á súa cancelación, algo que terá que explicar en todo caso a organización do mesmo; mais aclaramos isto para rexeitar ás acusacións de agresións e de ataques ao movemento cultural ou o mundo ca cultura.

As mulleres organizadas en Galegas 8M reafirmámonos na acción levada a cabo pola necesidade de denunciar as políticas agresivas da dereita e o noso apoio ás mulleres sinaladas nas últimas horas, porque a planificación e realización da acción foi previamente debatida e consensuada pola asemblea da organización do 8M en Ourense e todas as que tomamos parte queremos que quede claro. Ademais demandamos a retirada do comunicado no que se sinala a compañeiras e unha desculpa ante as calumnias que se verteron sobre nós.

Listado de mulleres que apoian o comunicado:

Se queres sumar o teu apoio escribe a galegas8mou@gmail.com.